بقلم -مالك السعيد المحامي
هنوضح النهاردة الفرق ما بين الحضانة والولاية والوصاية والقوامة.
أولاً الحضانة:
الحضانة بتبقى رعاية وحفظ للطفل بتقوم به الأم وبتكون مسئولة عن سلامته وتربيته وبتفضل الأطفال في حضانة الأم حتى سن ١٥ سنة إلا إذا المحكمة بعد كده حكمت بمد مدة الحضانة بعد تخيير الصغير حتى بلوغ سن الرشد للولد وزواج البنت.
ثانياً الولاية : نوعان :
1- الولاية علي النفس:
ودي العناية بكل حاجة تخص القاصر والاشراف عليه وتربيته وتوجيهه وإعداد القاصر إعدادًا صالحاً كولاية التعليم والزواج، واللي بيطلق عليها ولاية النفس الصغير لحد سن الرشد وبتكون الولاية للأب.
2-الولاية علي المال:
و دي بتكون العناية بأي حاجة ليها علاقة بمال القاصر من حفظ واستشارة ودي بتكون ولاية قضائية ووالولاية هنا برضه بتكون للأب.
ثالثاً الوصاية: نوعان :
1- الوصي المختار :
ودي بيكون الأب مختار شخص قبل وفاته لإدارة أموال ابنه القاصر وبتنتهي ببلوغ القاصر سن الرشد.
2-وصاية قضائية :
و ده بتختاره المحكمة أو نيابة الأسرة ليكون وصي في حالة عدم وجود وصي مختار أو جد صحيح.
رابعاً: القوامة:
ودي بتكون علي المجنون والمعتوه والسفيه وذو الغفلة، بتكون عبارة عن وكالة قضائية وبتجوز برضه علي المفقود والغائب.
